અમદાવાદ, તા. ૧૦ મહાવીર જયંતિ નિમિત્તે ગુરુવારે સ્થાનિક શેરબજારો બંધ રહ્યા હતા પરંતુ વૈશ્વિક શેરબજારોમાં મિશ્ર ટોન જોવા મળ્યો હતો. એશિયા તથા યુરોપના બજારોમાં મજબૂતાઈ રહી હતી પરંતુ બુધવારના ઉછાળા બાદ અમેરિકન શેરબજારો ગુરુવારે દોઢથી અઢી ટકા નરમ ખૂલ્યા હતા.
ગિફટ નિફટી ૬૫૦ પોઈન્ટથી વધુ ઊંચકાયો હતો અને મોડી સાંજે ૨૩૧૦૦ જોવાયો હતો. એનએસઈ ઈન્ટરનેશનલ એક્સચેન્જ પર વેપાર થતા ગિફ્ટ નિફટીના ઉછાળાને જોતા શુક્રવારે દેશના બેન્ચમાર્ક ઈન્ડાઈસિસ સેન્સેક્સ તથા નિફટી તેના આગલા બંધથી ગેપમાં ખૂલવાની અપેક્ષા રાખવામાં આવી રહી છે.
અમેરિકન પ્રમુખ ડોનાલ્ડ ટ્રમ્પે ટેરિફ મુદ્દે ચીન સિવાય અન્ય દેશો પર પોતાનું વલણ હળવું કરતા વૈશ્વિક બજારોમાં ગુરુવારે તેજી જોવા મળી હતી અમેરિકાએ ચીન પર રેસિપ્રોકલ ટેરિફ ૧૨૫ ટકા કર્યું છે જ્યારે ૭૫ જેટલા દેશો પર ઊંચા ટેરિફ દર ૯૦ દિવસ સ્થગિત રાખવાનો નિર્ણય જાહેર કર્યા બાદ શેરબજારોમાં મોટી તેજી જોવા મળી હતી.
ટ્રમ્પ દ્વારા ટેરિફના અમલ પર ૯૦ દિવસની રાહત અપાયા બાદ ગઈ રાત્રે અમેરિકી શેરબજારમાં પ્રચંડ ઉછાળો નોંપાયો હતો જે આજે કામકાજના પ્રારંભિક તબક્કામાં ધોવાઈ જવા પામ્યો હતો.
અમેરિકી શેરબજારમાં આજે કામકાજના પ્રારંભિક તબક્કામાં ડાઉજોન્સમાં ૧૩૭૦ પોઈન્ટનું ગાબડું પડતા તે ૩૯૨૩૮ ઉતરી આવ્યો હતો જ્યારે નાસ્ડેકમાં ૮૬૦ પોઈન્ટનું ગાબડું ૫ડતા ૧૯૨૬૪ અને એસએન્ડપી-૫૦૦ ૨૩૪ પોઇન્ટ ઘટીને ૫૨૨૨ની સપાટીએ રહ્યો હતો ગઈકાલે અમેરિકી શેરબજારમાં ડાઉજોન્સમાં ૭.૯ ટકાનો, નાસ્ડેકમાં ૧૨.૨ ટકા અને એસએનપી-૫૦૦માં ૯.૫ ટકાનો ઉછાળો નોંધાયો હતો.
યુરોપિયન બજારોમાં આજે મોડી સાંજે લંડનનો ફીત્સી ઈન્ડેક્સ ૩૦૦ પોઈન્ટ વધીને ૭૯૭૯ની સપાટીએ રહ્યો હતો જ્યારે જર્મનીનો ડેક્સ ઈન્ડેક્સ ૯૮૧ પોઈન્ટ વધીને ૨૦૬૫ર તથા ફ્રાન્સનો સીએસી ઈન્ડેક્સ ૩૧૯ પોઈન્ટ વધીને ૭૧૮૨ની સપાટીએ કાર્યરત હતો. એશિયાઈ બજારોમાં આજે જાપાનનો નિક્કાઈ ઈન્ડેક્સ ૨૮૯૪ પોઈન્ટ ઉછળીને ૩૪૬૦૯, તાઇવાનનો ઈન્ડેક્સ ૧૬૦૮ ઈન્ટ ઉછળીને ૧૯,૦૦૦ પહોંચ્યો હતો.
અન્ય ઇન્ડેક્સમાં સિંગાપોરનો સ્ટ્રેઈટ ૧૮૪ પોઇન્ટ વધીને ૩૫૭૭, હોંગકોંગનો હેંગસેંગ ૪૧૭ પોઇન્ટ વધીને ૨૦૬૮૧, દ. કોરિયાનો કોસ્પી ઈન્ડેક્સ ૧૫૧ પોઈન્ટ વધીને ૨૪૪૫, ઈન્ડોનેશિયાનો ઈન્ડેક્સ ૨૮૯ પોઇન્ટ વધીને ૬૨૫૪ અને ચીનનો શાંગહાઈ ઈન્ડેક્સ ૩૬ પોઈન્ટ વધીને ૩૨૨૩ની સપાટીએ રહ્યો હતો.
પાકિસ્તાનનો કરાંચી-૧૦૦ ઈન્ડેક્સ ૨૦૩૬ પોઇન્ટ વધીને ૧૧૬૧૮૯ પર રહ્યો હતો. રેસિપ્રોકલ ટેરિફને ૯૦ દિવસ માટે મોકૂફ રખાતા વૈશ્વિક ઈક્વિટી બજારોની સાથેસાથ જોખમી એસેટસ ક્રિપ્ટોકરન્સીસમાં પણ ઉછાળો આવ્યો હતો અને મુખ્ય ક્રિપ્ટો બિટકોઈનમાં ફરી ૮૩૦૦૦ ડોલરની સપાટી જોવા મળી હતી.
અન્ય ક્રિપ્ટોસ જેમ કે એકસઆરપી તથા એથરમમાં ૧૨ ટકા જ્યારે સોલાનામાં ૧૦ ટકાથી વધુનો ઉછાળો જોવા મળ્યો હતો. છેલ્લા ચોવીસ કલાકમાં બિટકોઈન ઊંચામાં ૮૩૪૩૫ ડોલર અને નીચામાં ૭૫૯૨૯ ડોલર થઈ મોડી સાંજે ૮૧૮૯૫ ડોલર કવોટ થતો હતો. એથરમ ઊંચામાં ૧૬૮૨ ડોલર અને ૧૪૪૫ ડોલર વચ્ચે અથડાઈ મોડી સાંજે ૧૫૯૯ ડોલર ક્વોટ થતો હતો.
